CCCXII.

1415, Juni 17. o. O.

Verzicht auf das Erbgericht zu Baumgarten.

Ich Wenczla von Reichinbach und ich Steffan und ich Segymund von Reichinbach gebrudir, erbherren des nochgeschrebin gutis thuen kund und bekennen uffintlichem yn desem brife allen, di den briff zehen, horen adir lesin, das vor uns komen seynt die erwarn, weizen und gesworne scheppin, di czu den geczeytin ym rechtin gesessin habin czum Bawmgarthen, alz Matis Ochsina, Hannos Ochsina, Hannos Jorge, Mertin Polan, Cloze Heilwig, Cloze Schefer, Hannos Spelina, und haben vor uns bekant aus gehegitem dinge, das vor das gehegte ding komen seynt Peter Fleischwvnkil, der eczwen schulteis czu Bresnicz gewest ist mit syne kyndirn, alz Nickil, Bernhard syne zone und Anna syne tochtir, und habin uffinbar vor uns bekannt vor gehegitem dinge, das en eyne erwar gancze genuge geschen ist von Peter Schultis von synis erbgerichtis wegin czum Bawmgarthen und habin sich vorczegin allir sproche und allis angefellis, das ze gehabit habin adir ummir mochten gewynnen uff deme egenantin gerichte; is zei vil adir wenyng, gros adir cleyn, weglich adir unweglich, fruchte, rente, czinse und alle czugehorunge des zelbin gerichtis, is zei benant adir unbenant, keynis ausgenomen. Des habin ze sich gancz und gar alzumole vorczegin nu und hernoch ewiclichen und nymmir mir anczusprechen den egenantin Peter Schultis und das gerichte czum Bawmgarthen, en noch syne eliche hausfrawe noch syne kyndir, noch alle syne elichen geerbin und alle syne nochkomelynge. Und auch hat der egenante Peter Fleischwynckil mit allen synen kindirn, die obschrebin sten, alle mit gutir vornumfft, umbetwungen, umbetrogin, mit gutir vornumfft wol gesunt leibis und synnen und mit gutem willen, den egenanten Peter Schultis, en und seyn erbgerichte, syne eliche hausfrawe, syne kyndir und alle syne elichen geerbin und nochkomelynge los, frei, queit und ledic gelossin allir ansproche, alz obschrebin stet, vnd keyn hyndirnis noch keynirlei potwerre doreyn czu legin, zundir yn allen guten und yn keynirlei argelist mit wortin noch mit werken. Das globe wir stete gancz und gar czu haldin, als erwar und frome leute, keyne nochrede dorumme czu habin nu und ewiclichen und ummir mir. Des czu geczugnis und czu eyme ewigin gedechtenis habe ich Wenczla von Reichinbach und von meynir brudir wegin meyn ingesegil gehangin an desin briff, der gegeben ist am nesten montage vor zente Johannes tag des tewffers, noch gotis geburt firczenhundirt iar dornoch yn deme funffzenden iare.

Or. Perg. Das an einem Pergamentstreifen befestigte S. ist fast gänzlich zerstört.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.